[ Seite 326 ] |
|
:
zur
Geschichte des Landes Röbel.
Nr. XL.
Der Fürst Bernhard von Werle verpfändet dem Herzoge Albrecht von Meklenburg Schloss, Stadt und Land Röbel.
D. d. Röbel. 1362. März 10.
Nach dem Originale im grossherzogl. mekl. Geh. u. H. Archive zu Schwerin.
Wy Bernt van godes gnâden here to Werle myt vsen rechten eruen bekennen vnde betůghen ôpenbâre in desser yeghenwardighen scrift, dat wy myt dem dorluchteghen vorsten vnsem lêuen vedderen hertoghe Alberte van Mekelenborch, greuen to Zwerin, to Stargarde vnd to Rozstok heren ghedêghedinghet hebben vm Robelle in desser wîs: De gůltde, de wy to Plawe toleghen scůlden vt dem lantde to Warne, de scal vse veddere vnde sîne eruen vs lôs lâten, vnd dat vêrdendêl des gheldes, dâr em Plawe vôr steyt, vnd vôr de anderen pennighe vnd sůluer, de dâr na blîuen, scal dat slot Plawe myt sînen tobehôringhen sîn pant blîuen brůkelken, als vse brêue dâr vp lûden. Vortmer wes Claws van Plasten vs reddelken berekenen mach, dat schal he vs ôk vp dat vôrbenômede slot slân, dâr eme vôr Warne vnde Pentzelin steyt, vnd scal Claws der scůlde vîfhůntdert lôdeghe mark vse veddere hertoghe Albert edder sîne eruen tůsschen hîr vnd sůnte Johannes dâghe to myddensomer vntrichten, vnd wes dârôuer is, dat scal eme vnd sînen eruen vse veddere vôrbenômet na her Hinrikes râde van Stralendorpe mâken, alse dat id reddelk sy, vnd want vse veddere de vîfhundert lôdeghe mark
Seite 327 |
Claws van Plasten betâlet heft tuschen hîr vnd sůnte Johannes dâghe vnd in dem anderen gheltde, wat dâr ôuer is, na her Hinrikes râde bewâret is, so scal Claws van Plasten dat vôrbenômede slot Robelle, dat he van vser beyder weghene to trůwer hant inne heft, vsem vedderen hertoghen Alberte van Mekelenborch vnde sînen eruen antwarden sonder vortoch vnd hindernisse to gůde, vnd wy Bernt vnde vse eruen scolen vsen vedderen vôrbenômet vnde sînen eruen dat slot Robelle, stat vnd lant myt al sînen tobehôrnde vorbrêuen, dat se dâr an vorwâret sint, to alme heren rechte vôr de vôrsprôken summen, vs vnde vsen eruen dâr an nicht to beholdende, behaluen vses wyues lîfghedingh, als den hof to Gnewe, dat dorp to Cernowe, Semsin, Solsowe, Wypperowe des wy dâr hebben, Meltze, Bokholte vnd sôuen hôuen de wy dâr hebben to Priborn myt erer tobehôringhen, als se in erer schêde ligghen, de wyle dat se leuen; wêre ôuer dat se storue, êr wy dat slot vnd lant lôseden, so scal dat lîfghedingh an vsen vedderen vnd an sîne eruen steruen vnd vallen to brûkende, also langhe want wy edder vse eruen dat slot vnd lant to Robelle van vsen vedderen lôseden, vnd scholen scheppen hůldinghe der man vnde der borghere vsen vedderen vnd sînen rechten eruen to ênem rechten weddeschatte, also dat he vnde sîne eruen dâr an vorwâret sint. Wortmer wêre dat Claws van Plasten schâden nême edder koste dêde tusschen hîr vnde sente Johnnnes dâghe, de wyle dat he dat slot wâret, de schole wy vsem vedderen vp dat slot vorbrêuen to gheuentde myt der anderen summen to ênem mâle. Vortmer scal vse veddere vnde sîne eruen vse man gheystlik vnd werlik by rechte lâten vnd scal vse brêue holtden, de wy hebben ghegheuen êr desser tîd. Vortmer wêre dat vse veddere edder sîne eruen desse dêghedinghe nicht voltôghen vs vnde vsen eruen tusschen hîr vnd sente Johannes dâghe, so scholen desse dêdinghe nyne macht hebben vnd Claws van Plasten scal vs vnde vsen eruen Robelle wedder antwarden van staden vnde âne vortoch, vnde wy scholen Claws van kosten vnde van schâden nemen, de he deyt bynnen desser tîd to sente Johannes dâgehe. Wêre ôk dat vse veddere hertoghe Albert vôrbenômet edder sîne eruen vs edder vsen eruen desse dêdinghe, de hîr vôr screuen stân, tůsschen hîr vnd sente Johannes dâghe nicht enden vnde voltôghen, so scholen de brêue vnde
Seite 328 |
dêdinghe, de vse veddere vnde sine eruen hebben vp Plawe vnd dat lant to Warne, by erer ghantzen macht blîuen vnd vnghemynneret. Al desse dingh, de vôrscreuen sint, stede vnd vast to holtdende sůnder yênnegherleyhe arghelist vnde hulperede lôue wy Bernt here van Wentden myt vsen rechten eruen in gûden trůwen to holdende vsem vedderen hertoghen Alberte van Mekelenborghe vnde sînen rechten eruen an dessem brêue. Tů grôter bekantnisse desser dingh hebbe wy vse hêmelke ingheseghel vôr dessen brêf ghehenghen lâten, gheuen vnde screuen to Robelle na godes bôrt dûsen drêhůntdert iâr an den twê vnde sosteghesten iâre, des donredâghes vôr sente Gregorius dâghe. Tůghe desser dingh sint vse lêuen trûwen Claws van Plasten, Claws Karghowe, Yghe Grambowe vnd Thidericus Wostzterrode vse pâpe vnd ander lûde nôch de tûghes werdich sint etc.
Nach dem im grossherzogl. meklenburg. Geh. u. Haupt - Archive zu Schwerin aufbewahrten Originale, an welchem des Fürsten Bernhard Siegel an einem Pergamentstreifen hängt.
Nr. XLI.
Der Herzog Albrecht von Meklenburg verpfändet an Andreas Flotow d. A. Stadt und Land Röbel.
D. d. Rostock. 1366. Jan. 6.
Allen gůden lûden, de dessen brêf seen edder hôren lesen, den dô wy râtmanne van Robele witlik vnde betůghe an desseme brêue ôpenbâre, dat wy na godes bôrt dûsent iâr drêhundert iâr an deme achte vnde sesteghesten iâre des vrydâghes vôr palmen hebben gheseen vnde hôret lesen des acbaren wolghebôren heren brêf hertoghen Albrechtes van Mekelenborch, greuen van Zwerin, heren tů Rostoch vnde Stargarde begheseghelt myt syneme yngheseghel, nicht ghescâuen, nicht ghedeleghet, gans vnde heyl vnde an neghênen dinghen tů strâfende, van worden tů worden, also hîr na ghescreuen steyt:
Wy Albrecht van der godes gnâde hertoghe to Mekelenborch, greue to Zwerin, to Stargarde vnde to Rostoc
Seite 329 |
here, vnde vnse rechten eruen bekennen vnde betůghen ôpenbâre vôr al den, de dessen brêf seen edder hôren lesen, dat wy hebben ghesettet vnde lâten de stat vnde dat lant to Robele olden Drewese Vlotowe vnde synen rechten eruen, myt aller plycht, nůt, gůlde vnde mit alleme rechte, wes dâr nu lôes ys edder lôs werden mach in tokômender tyd, mit weyde, mit wâtere, mit holte, mit wisschen, mit invlôte, mit vtvlôte, myt stouwinghe, myt visscherye, mit dêneste, mit tollen, mit rychte hôch vnde zyd, mit bêde, mit brôke vnde mit scote vnde mit aller anderen tobelâghe, also yt an syner bescêde beleghen ys, vôr vyftehalf dûsent mark lubischer penninghe, de vns redelyken betâlet vnde vntwůren synt, also dat vns ghenôghet, vnde wy edder vnse rechten eruen scolen Drewese edder synen eruen von dessen vôrbenômeden stat vnde lande to Robele nicht afsetten, wy enhebben em edder synen eruen de gantze vôrbenômeden summen êrst berêt vnde betâlet mit rêden penninghen na willen vnde tů gůde to Rostoch edder to deme Sterneberghe edder to Gůstrow edder to Parchym edder to Butzow, wôr yt em edder synen eruen best êuent in der vôrbenômeden steden een. Wêr âuer dat de berêdinghe in vnseme lande scûde, so scole wy de iênen, de de berêdinghe vntfân scolen, leyde[n] vnde velyghen to vnde af; des ghelykes scal ôk Drewes edder syne eruen dôen, oft de berêdinghe sceen scolde in êner der vôrbenômeden steden van deme heren, des yd in syneme lande lycht. Vortmer wêre dat Drewese edder syne eruen vôrbenômet de vorbenômde stat to Robele afghewunen worde, dat got vorbêde, so scolde wy edder vnse eruen em edder synen eruen behulpen wesen mit aller macht vnde mit gantzen trůwen, also langhe went he dat slot weldichlyken an syner wêre wedder heft. Vortmer scal de vôrbenômde Drewes vnde syne eruen desse vôrbenômden pande brůklyken besytten vnde beholen mit al deme, dat dâr tů behôret, nycht vt to nemende edder vns vnde vnsen eruen to beholdende, herschop vnde manschop, orsedênest vnde kerkleen, gheystlik vnde werlik, vnde dat vôrbenômde slot to Robele scal iô to allen tyden vnse vnde vnser eruen ôpene slot syn, to allen vnsen nůden vnde nôden, vt vnde in to rydende, wan yt vns beheghelik ys. Vortmer scal de vôrbenômde Drewes edder syne eruen desse vôrbenômden panden nerghene mede vorbreken edder
Seite 330 |
werken, wy nehebben em edder synen eruen desse vôrbenômden summen ganslyken betâlet vnde he edder syne eruen scolen ôk vte deme vôrbenômden slote nemende vorvân edder vorwerken edder nicht vt dôen, he endôet nach vnseme edder vnser eruen hête vnde râde. Vortmer scal de vôrbenômde Drewes vnde syne eruen man, borghere vnde bůr, de in der stat vnde in deme lande to Robele beseten synt, by al deme rechte lâten, dâr se vôre van oldinghes inne ghewesen hebben. Wêre ôk dat de vôrbenômde Drewes edder syne eruen wes lôseden edder kôften nach vnsem edder vnser eruen râde, dat de van Wenden vôre vorsettet hadde, dâr scôle wy ene by lâten, also als dat vôre vorsettet heft ghewesen in deme sůluen landen, also langhe, went wy em vnde synen rechten eruen ere ghelt wedder gheuen, dâr se dat vmme lôset hebben. Alle desse vôrbenômde stůcke stede vnde vast to holdende, dât lôue wy hertoghe Albrecht vnde vnse eruen vôrbenômed deme vôrbenômden Drewese vnde synen eruen vnde to erer hant iuncheren Joachim here te Potlest vnde iunghen Drewese, Henneken vnde Tydeken Vlotowe, Hinricke van Stralendorpe, Vicke Molteken van deme Strytuelde vnde Kersten Bosele, ridderen, Lůder Lutzow, Clawes Hanen vnde Hinric Lewetzowe, knapen, vnde hebben tů tůghe vnse yngheseghel henghen lâten in dessen brêf, de gheuen ys to Rostoch na godes bôrt drutteyn hundert iâr an deme sos vnde sosteghesten iâre, an deme dâghe to twelften.
Dat desse brêf aldůs ys vnde lůt, dat betůghe wy râtmanne to R bele mit vnseme yngheseghele, dat vôr dessen brêf ghenghet de ys ghescreuen na godes bôrt dûsent iâr drêhundert iâr an deme achte vnde sosteghesten iâre, des vrydâghes vôr palmen.
Nach dem im grossherzogl. meklenb. Geh. und Haupt - Archive aufbewahrten Original - Transsumte in einer kleinen, etwas flüchtigen Minuskel.
Der Herzog Albrecht von Meklenburg hatte, nach den Original - Concepten der darüber ausgestellten Urkunden, am 30. Junii 1362 Land, Schloss und Stadt Röbel von dem Fürsten Bernhard von Werle zu Pfand genommen (vgl. auch Rudloff Mekl. Gesch. II, S. 451) und sich dabei verpflichtet, sich ohne Zustimmung des Fürsten Bernhard mit Drewes Vlotow nicht zu sühnen und ihm die Briefe nicht zu halten, welche der Fürst Bernhard ihm gegeben habe.
Seite 331 |
Nr. XLII.
Der Fürst Bernhard von Werle verleiht dem Arend Boseke erblich das Schulzenamt des Dorfes Melz
D. d. Waren. 1379. April 25.
Nach einer beglaubigten Abschrift aus dem Anfange des 16. Jahrhunderts im grossherzogl. mekl. Geh. u. H. Archive zu Schwerin.
Wy Berndt van gotts gnâden here tho Werle bokennen âpenbâr in desseme brêue, dat wy vnde vse eruen hebben settet myt berâdeme môde Arnde Boseken vnde szyne eruen to eyneme schulten in deme dorpe Meltze vnde hebben em dat schultampt geuen vnde lêggen em vnde geuen tho deme schultamptte twê hôuen in deme suluygen dorpe Meltze: de eyne hôuen scal he vnde syne eruen hebben fry myt pacht, bêde, hundekorne, weyde, grasz vnde myt aller fryheyth, alsze se licht bynnen erer scheyde, men dâr an beholden wy vns dat hôgeste richte, wâter vnde holt; de andern hôuen scal he vnde syne eruen hebben myt bêde, hundekorne, deynste, weyde, grasz vnde mit aller fryheyth, hyr anne beholden wy vns dat hôgeste rychte, wâter vnde holt, an desser suluygen eynen hôuen lâthe wy em nyne pacht. Hyr aff schal he vnde syne eruen vs vnde vsen eruen dôn, alsze de schulten in den lande plegen tho dônde vnde als ehm behôrt Dyt lâue wy Berndt here tho Werle vôrbenômet vnde vse eruen deme vôrbenômeden Arnde Boseken vnde synen eruen stede vnde vasth tho holdende vnde hebben thu thûghe desser dynck vse ingesegel myt vser wytscaff hengen lâen an dessen brêff, de geuen is tho Warne na gades bôrt druthteygen hundert iâr in deme negen vnde sôuendygesten iâr, in sunte Marcus dâge des hylligen êwangelisten. Hyr ôuer synt wesen: her Johan Bockholt vnde her Gheruen Tetrow, prystere, vse pâpen, vnde Hennynck Lanckow vnde mêr gûder lûde lôenwerdich.
Auschultata et fideliter collationata est hec presens copia per me Petrum Lindemann, publicum Hauelbergensis diocesis clericum coniugatum, sacris apostolica et imperiali auctoritatibus no-
Seite 332 |
tarium, et concordat cum suo vero origenali de verbo ad verbum, vt protestor in hiis manu mea subscriptis.
Nr. XLIII.
Die Fürstin Elisabeth, Gemahlin des Fürsten Bernhard von Werle, verleiht dem Arend Boseke erblich das Schulzenamt des in ihrem Leibgedinge liegenden Dorfes Melz.
D. d. Waren. 1379. April 25.
Nach einer beglaubigten Abschrift aus dem Anfange des 16. Jahrhunderts im grossherzogl. mekl. Geh. u. H. Archive zu Schwerin.
Wy Elzebe van Wenden, van der gades gnâde eyne frouwe van Werle, bekennen âpenbâr in dessem brêue, dat wy hebben settet myt hêthe vnde vulbôrth myns heren her Berndes van Wenden Arnde Boseken vnde syne eruen to einem schulten in deme dorpe tho Meltze und hebben em dat schultampt geuen vnde lêgen ehm vnde geuen tho deme schultampt twê hôuen in deme suluen dorpe Meltze: de êne hôuen schal he vnde syne eruen hebben vryg, myt pacht, bêde, hundekorne, weyde, grasz, myt aller fryheyth, als se lycht bynnen erer scheyde, men dâr ahn beholde wy vs dat hôgeste richte, wâter vnde holt; de anderen hôuen scal he vnde syne eruen hebben myt bêde vnde hundekorne, deynst, weyde, grasz vnde myt aller vryheyth, hyr anne beholde wy vns dat hôgeste richte, wâter vnde holt, an desser suluen ênen hôuen lâte wy em nêne pacht. Hyr aff schal he vnde syne eruen dôn, alse de schulten in den landen plegen to dônde vnde alsz em bohôrt. Dyt lâue wy Elzabe van Wenden vôrbenômet myt vnsen nakâmelyngen deme vôrbenômeden Arnde Boseken vnde synen eruen stede vnde vaste tho holdende vnde hebben thu thûge desser dynck vse ingeszegel myt vser wytscaff hengen lâten an desseni breff, de geuen isz tho Warne na gades bôrth drutheygenhundert iâr in deme negen vnde sôuendygesten iâr, in sunte Marcus dâge des hyllygenn êvangelisten. Hyr âuer szynt weseth: her Gerwen Teterow, her Johan
Seite 333 |
Bockholt, prêstere, vse pâpen, vnde Hennynck Lanckow vnde mêr gûder lûde lôuenwerdich.
Auschultata est et fideliter collationata hec presens copia per me Petrum Lindeman, publicum Hauelbergensis diocesis clericum coniugatum, sacris apostolica et imperiali auctoritatibus notarium, et concordat cum suo vero origenali, ut protestor in hiis manu mea subscriptis.
Nr. XLIV.
Die Herzoge Johann, Ulrich und Albrecht von Meklenburg-Stargard verpfänden den Vettern Philipp und Hans Grambow, genannt Prignitz, Stadt und Land Röbel, mit Ausnahme der Leibgedingsgüter der Fürstin Elisabeth von Werle, des wail. Fürsten Bernhard von Werle Gemahlin.
D. d. Bützow. 1391. Aug. 10.
Nach dem Originale im grossherzogl. mekl. Geh. u. H. Archive zu Schwerin.
Wy Johan, Vlrick vnde Albrecht van godes gnâden hertoghen to Mekelenborch, to Stargarde vnde to Rostok heren, brôdere, bekennen vnde betûghen ôpenbâr in dessem brêue vôr alle den gênen, de en seen edder hôren lesen, dat wy vnde vse rechten eruen schuldich synt den duchtigen lûden Philippus vnd Hans Grambowe vedderen, anders geheyten Prigghenissen, vnde eren rechten eruen drê dûsent lubesche mark gûder suluerpennighe vnde hundert lubesche mark der suluen munte, de se vns rêde gelênet hebben vnde an vse nůt brûkelken gekômen sint. Vôr desse vôrscreuen summen setten vnde lâten wy vôrbenômeden hertoghen Johan, Vlrick vnde Albrecht desse vôrbenômeden Grambowen vnde eren rechten eruen in dessem ieghenwardighen brêue vnse stat to Robele mit der gantzen vaghedige, dâr de herscap recht an is, vnde mit allem anvalle, sunder den anvall, de vns vnde vsen eruen anvallen mach van der hôchgebôrnen vorstynnen vnde vrouwen, de iung-
Seite 334 |
heren Berndes êrlike husvrowe wesen hadde, dem got gnedich sy, to eynem brûkelken pande, also langhe bet wy vôrbenômeden hertogen Johan, Vlrick vnde Albrecht vnde vse eruen den vôrbenômeden Grambowen edder eren eruen gentzliken wedder geuen hebben de drê dusent lubesche mark vnde hundert lubesche mark to eyner tyd vnde eynem mâle an gûden lubeschen penninghen, alz hîr vôrscreuen is, bynnen Robele edder bynnen Wistock, wôr en edder eren eruen dat êuenst kumpt, vnde wy vôrbenômeden hertoghen Johan, Vlrik vnde vse eruen scolen vnde willen in der vôrbenômeden stat vnde voghedige nicht beholden men de lôsinghe, kerklên vnde manscop vnd use ôpene slot to wesende to al vsen nôden, dat schal den vôrbenômeden Grambowen to nênem schâden kômen. Ok so wil wy vôrbenômeden hertogen Johan, Olrick vnde Albrecht, dat desse vôrbenômeden Grambowen edder ere eruen desse vôrbenômede stat vnde voghedige nerghen mede scolen edder konen vorbreken teghen vns edder vse eruen. Wêre ôk dat en desse vôrbenômede stat afgewunnen worde, dat got vorbêde, so scolen vnde willen wy vôrbenômeden hertogen dessen Grambowen edder eren eruen desse vôrbenômede stat vnde voghedige wedder scheppen bynnen dem nêgesten vêrdendel iâres dâr na edder em ere penninghe wedder geuen sunder iênergherleye vortoch edder hulperede. Wêre ôk dat sik iênich man vorvenghe an dessen vôrbenômeden Grambowen, an eren eruen edder an eren vrunden an rôue, an brande, an welkerleye dat scûde, dat scolen se vns vôrbenômeden hertogen kundighen vnde witlik d n, dâr scole wy en bynnen den neghesten veerweken lîkes vnde rechtes ôuer helpen. Were ôk dat wy des nicht endêden, so scolen vnde môghen desse vôrbenômeden Grambowe edder ere eruen mit eren vrunden dat wedder d n vte desser vôrbenômeden stat vnde voghedige vnde dâr wedder yn sunder iênegherleye brôke ieghen vns vnde vnse eruen. Al desse vôrscreuen stucke vnde artikel to sâmende vnde eyn yslich by sik lôue wy vôrbenômeden hertoghen Johan, Vlrick vnde Albrecht vôr vns vnd vôr vnse eruen vnde vôr vnse nakômelinghe den vôrbenômeden Grambowen vnde to erer truwen hant her Wedeghe Bugghenhagen, Hans Platen vnde Achym Platen, Ebelle vnde Clawes Cunow, Henningh Meelberghe,
Seite 335 |
Bruningh Grambowen vnde Clawes Rusen an gûden trûwen stede vnde vast to holdende sunder iênegherleye arghelist edder hulperede. To eyner hôgern bewâringhe vnde to mêrer witscap desser vôrgescreuen dingh so hebbe wy vôrbenômeden hertoghen Johan, Vlrick vnde Albrecht vse yngesigele mit gûdem willen vnde witscap henghen lâten an dessen brêff, de geuen vnde gescreuen is to Butzow na godes bôrt dûsent iâr dâr na in dem en vnde neghentighesten iâre in sunte Laurencius dâge des hilgen mertirers. Tûge desser dingh sint gewest: vse lêue brôder her Rodolff, bischop to Sweryn, vnde vse lêuen getrûwen: Johan van Plesse, Helmolt van Plesse, Reymer Barnekowe, Wedege van Plote, Alerd Tzernin, Clawes R se, knapen, vnde her Johan Prouest, kerkhere to Warnemunde, vnde ander gûder lûde genûch de tûges wol werdich synt.
Das Pergament ist in der Mitte durchschnitten und die 3 angehängten Pergamentstreifen sind der Siegel beraubt.
Nr. XLV.
Die Herzoge Johann und Ulrich von Meklenburg-Stargard verleihen dem Ritter Claus Hahn auf Solzow zu freiem, erblichen Lehn die ihnen angefallenen Leibgedingsgüter der wailand Fürstin Elisabeth von Werle, des wailand Fürsten Bernhard von Werle Gemahlin, (die Höfe zu Solzow und Gnewe, die Dörfer Zarnow und Melz und Antheile an Vipperow und Priborn).
D. d. 1410. Aug. 15.
Nach einer beglaubigten Abschrift aus dem 16. Jahrhundert im grossherzogl. meklenb. Geh. u. H. Archive zu Schwerin.
Wy Johan vnd Olrich, brôdere, van gades gnâdenn hertoghenn to Meckelenburgh, to Stargarde vnd to Rostock der lande herrenn bekennen vnnd betûgenn âpenbâre ahnn desseme brêue vôr alle den iênenn, de ene zeen oder hôrenn lezenn, dat wy mitt vnsen rechten
Seite 336 |
eruenn hebben gegeuen vnd geuenn mit macht desses brêues vnseme lêuen getrewenn deme strengenn manne her Claws Hanen vnnd sînenn rechtenn eruenn dat gûdt vnnd anual, dat vns angestoruen is von der edelen, wolgebôrnen frowen frowe Elzebenn, herrn Berndes êlikenn frowenn, heren to Werle, den godt gnâde, de wy deme zuluen her Claws Hanenn êr hebbenn gegeuen to zîme lîue, also geue wy Johann vnnd Olrich vôrbenômet mit vnsenn eruenn her Claus Hanen vôrschreuen vnd sînen rechtenn eruenn dat vôrbenômede gût to erue to êwegenn tîdenn, alzo her Claws Hanen dat vonn vnser wegen angestoruen is na vthwîsinghe des brêues, den wy ene vppe dat gûdt ghegheuen hebben, vnnd schall dat gûdt brûkelken hebben vnd besittenn mitt sînenn rechtenn eruenn, mit aller freyheitt, rechtigcheitt, thobehôringhe vnnd mit allen rechtenn, alze dat licht binnen sîner schêden ahn doerpern, ahnn hôuen, ahnn hûuen, ahnn acker bûett vnnd vngebhûett, ahn holtenn, ahnn brûcken, ahn buschen, ahnn wischenn, ahnn wâtere, ahnn wâdentôgenn, an vischerîghe, alze de von oldinges dâr iê tho leghenn hebben, ahnn gresingenn, ahn weyden, mitt dîkenn, mit allenn dîkenn gestowet vnnd vngestowett, mitt inulôtenn, mit vthvlôtenn, mitt môlen, molenstedenn, gebûett vnnd vngebûett, vnd mitt allenn wegenn, inwegenn vnnd vthwegenn, vnnd vortt mitt aller vruchtt vnnd nuttigkeitt vnd mitt allen hernn diennste vnd mitt allem rechte vnnd richte, hôgest vnnd sydest, ahn hant vnd ahn halsz vnnd mit allem brôke, die dâr vth velt vnnd vallen mach, vnnd vortt mit aller vriegheitt vnnd rechtigkeitt, wo me de kann nômenn, alze de dâr van oldinges iê to leghen hefft, ghêstlich vnnd werligk, vns vnd vnsenn eruenn vnd nakômelinghen dâr mit alle nicht ahne tho beholdende, wann dat her Claus Hane vôrbenômett oder sîne eruen datt vôrbenômede gûth scholenn von vns vnd von vnsen eruenn tho lêne entpfangenn. Vnnd wy Johann vnd Olrich vôrbenômet schollen vnd willenn her Hanen vôrbenômett vnd zînen eruen des gûdes vôrbenômett êne wêre wesen, alze recht is, vôr alle de iênnenn, de vôr recht kommen willen, vnnd nein voigtt oder ambachtman schal van vnser wegenn ahnn dem gûde bot oder gebêde hebben, men her Hane vnnd zîne
Seite 337 |
eruenn schal dat gûdt fry hebben mit aller herschop vnnd eigendûme, alse vuse vôrvâren dat iê fryest besetenn vnd hat hebbenn. Wêre ôck dat dâr gûdt af vorsettet edder mitt vnrechte afgekâmenn whêre, dat mach her Hane vnd zîne eruenn dâr wedder tho lôsenn vnd mitt rechte dâr wedder tho bringenn, vnd dâr schole wy vnnd willenn em tho behulpenn wesenn wit threwen. Wêre ôck datt desse brieff irgenn anne vorsûmett wêre mitt einigerlei stucken edder artickulnn, dat schal her Claws Hanen vnd sînen eruenn tho neinem schâden komenn, wen wy scholenn vnnd willenn em mitt threwenn behulpenn wesenn, dat se by desseme vôrgeschreuen gûde blîuenn. Alle desse vôrgeschreuen stucke tozâmende vnnd ein îewelick artickel bi sich lâue wy vôrbenômede hertoghen Johann, hertoghe Olrich mit vnsenn eruenn her Claws Hanen vnd sînenn rechten eruenn stedte vnnd vhaste to holdende sunder hulperede vnnd arch. Tûghe alle desser vôrgeschreuenn dingk sindt vnse lêuen getrewenn: her Philippus Priggenitze, her Hanns Priggenisse vnnd her Heinrich Paschedach, ridder, Bruningk Grambowenn, Otke Marinn vnnd Tydeke Vriberch, knechte, her Johann Prouest, Arnoldus Boningk vnnd Johannes Wynhusen, vnse schrîuer. Tho hôgher bewâringe hebbe wy hertoghenn Johann vnd hertoghe Olrich vôrbenômett vnse ingezeghele mitt witschop vnnd mitt willenn hebben henghen lâten vôr dessen brêff, de ghegheuen vnd schreuenn is na godes bôrdt vêrteinhundert iâr dâr na ahn den teyen iâre, ahnn vnser lêuen frowenn dâge ehrer hemmelfarth.
Praesens copia correspondet genuino sigillato origenali testor ego Christophorus Scheplitz imperiali auctoritate notarius hac manus meae subscriptione.